|

सल्यान : जिल्ला निर्वाचन कार्यालय सल्यान निर्वाचनको तयारीमा जुटेको छ। निर्वाचन हुने वा नहुने भन्ने विषयमा विवाद भइरहँदा कार्यालय तयारीमा जुटेको हो।

सरकारले आगामी वैशाख १७ र २७ को निर्वाचनको घोषणा गरेको छ। अहिले जिल्लामा मतदाता नामावली अध्यावधिक कार्यक्रम सञ्चालनको तयारी भइरहेको जिल्ला निर्वाचन कार्यालयका निर्वाचन अधिकृत मधुकर कुमार शाहले जानकारी दिए। माघ १५ देखि स्थानीय तहमा सात दिन र जिल्ला स्तरमा १२ दिन अध्यावधिको काम गरिने उनले बताए।

‘सरकारले बैशाखमा गर्ने भनेर घोषणा गरिएको निर्वाचनको तयारी सुरु गरेका छौँ। नयाँ मतदाता नामावली संकलन कार्य गत पुस ६ गतेदेखि नै स्थगित गरिसकेका छौँ।’ उनले भने, ‘गत पुस ५ गतेसम्म १८ वर्ष उमेर पुगेका र फोटोसहितको मतदाता नामावली भएको सबैले मतदान गर्न पाउँछन्।’

२०७४ सालमा सम्पन्न निर्वाचनमा सल्यानमा १ लाख ३४ हजार २१३ जना मतदाता रहेकामा गत पुस ६ गतेसम्म १ लाख ४१ हजार २२० मतदाता रहेको जिल्ला निर्वाचन अधिकारी शाहले जानकारी दिए। यस्तै, जिल्लाभर १८५ वटा मतदान केन्द्र र १११ वटा मतदान स्थल निर्धारण गरिएको उनले बताए।

मतदाता नामावलीमा नाम भएका मतदाताहरुको अध्यावधिक गर्ने काम जिल्लास्तरमा र स्थानीय तहमा नै पुगेर गरिने उनले बताए। मतदाता नामावलीमा मतदाताले आफ्नो नाम विवरण हेर्न एवं अध्यावधिक गर्न, मतदाता नामावलीमा हुने दोहोरोपना तथा त्रुटि घटाउन, हालसम्म जिल्लामा संकलित मतदाता नामावलीलाई वैधानिकता दिन र आगामी बैशाखमा हुने निर्वाचनका लागी अध्यावधिक मतदाता नामावली तयार पर्ने उद्देश्यले मतदाता नामावली अध्यावधिकको काम सुरु गरिने शाहले बताए।

सम्वन्धित समाचार

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.